बागलुङ नगरपालिका : पानीपुरी र चटपट प्रतिबन्ध, खान परे अर्काे जिल्ला जानुस्

बागलुङ नगरपालिकाले नगरपालिकाभित्र पानीपुरी तथा चटपट व्यापार गर्न बन्द गरेको छ ।चना चटपट स्वास्थ्यका लागि हानिकारक भएकाे र नगरवासीको स्वास्थ्यमा नकारात्मक असर पर्ने भन्दै व्यापार गर्न रोक लगाएको हो ।

पानीपुरी तथा चटपटमा मिसाइने अखाद्य पदार्थले मानव स्वास्थ्यमा प्रतिकूल असर पर्ने, बजार जथाभावी फोहर भएको र अव्यवस्थित ठेला राखी चटपट व्यापार गर्दा नगरको साैन्दर्य बिग्रिएको भन्दै नगर कार्यपालिकाको निर्णयअनुसार पानीपुरी तथा चना चटपट प्रतिबन्ध गरेको बागलुङ नगरपालिकाका प्रमुख जनकराज पौडेलले बताउनुभयो ।

‘हेर्दा सामान्य निर्णय जस्तो लागे पनि पानीपुरी तथा चटपटले स्वास्थ्यमा निकै नकरात्मक प्रभाव पार्छ,’ प्रमुख पौडेलले भन्नुभयो, ‘व्यापार गर्ने धेरै विकल्प छन्, नागरिकको स्वास्थ्यमाथि खेलबाड गर्ने अधिकार कसैलाई छैन।’

अहिले बागलुङ बजारमा पानीपुरी तथा चटपटका ठेला देख्नै पाइँदैन, चटपट खान मनै लागे छिमेकी जिल्ला पुग्नुपर्दछ ।

युवायुवतीमाझ पछिल्लो समय निकै लोकप्रिय बनेको पानीपुरी तथा चटपट स्वास्थ्यका लागि भने निकै हानिकारक भएको डाक्टरहरु बताउँछन् ।

नगरको निर्णयले चना चटपट व्यापार गरी जीविकोपार्जन गर्ने व्यवसायीलाई भने समस्यामा पारेको छ । केही पानीपुरी तथा चटपटको व्यवसायीले अहिले तरकारी तथा फलफूलको व्यापार शुरु गरेका छन् भने केही चटपटकै व्यापार गर्न छिमेकी जिल्लातिर लागेका छन् ।

Loading...
प्रकाशित मिति ५ मंसिर २०७५, बुधबार १२:१८