८ लाख खर्चेर हेलिकप्टरबाटै निजगढ हेरेर फर्किए ‘माधव नेपाल र मन्त्री अधिकारी’

मनोज सत्याल
पूर्वप्रधानमन्त्री माधवकुमार नेपाल नेतृत्वको संसदीय उपसमिति दुई घन्टा हेलिकप्टरबाटै निजगढ हेरेर फर्किएको छ। सोमबार दिउँसो नेपाली सेनाको हेलिकप्टर लिएर उपसमिति सदस्य निजगढ उडेका थिए। उनीहरू उडेको हेलिकप्टर निजगढको आकाशमा चक्कर लगाएर फर्कियो।

पर्यटन मन्त्रालयले बाराको निजगढ अन्तर्राष्ट्रिय विमानस्थल बनाउन रूख काट्ने अनुमतिका लागि वन मन्त्रालयमा पत्र लेखेको थियो। आवश्यकताभन्दा धेरै रूख कटानका लागि अनुमति मागिएको भन्दै वन मन्त्रालयले हालसम्म पर्यटनलाई रूख काट्न अनुमति दिएको छैन।

प्रतिनिधि सभाको अन्तराष्ट्रिय सम्बन्ध समितिले निजगढ विमानस्थल निर्माण क्षेत्रमा रूख कटानबारे पर्यटन मन्त्री रवीन्द्र अधिकारीसँग छलफल गरेको थियो। छलफलपछि समितिले अध्ययनका लागि पूर्वप्रधानमन्त्री नेपाल नेतृत्वमा उपसमिति गठन गरेको थियो।

‘जाँदा फास्ट ट्र्याक हेर्दै गयौँ’, निरीक्षणमा गएका उपसमितिका सांसद दिव्यमणि राजभण्डारीले भने, ‘निजगढमा घना जंगल देखियो। कतै फडानी गरेको पनि देखियो। टाँगिया बस्ती हेरियो।’उनले निजगढको वन फन्को मारे पनि निर्माण क्षेत्र एकिन गर्न नसकिएको बताए।

संसदीय उपसमितिका सदस्यसँगै वन मन्त्री शक्ति बस्नेत र पर्यटन मन्त्री रवीन्द्र अधिकारी पनि हेलिकप्टरमा गएका थिए।
अनुगमनका लागि नेपाली सेनाको एमआई १७ हेलिकप्टर प्रयोग गरिएको थियो। सेनाले उक्त हेलिकप्टर उडाउन प्रतिघन्टा ४ लाख ६५ हजार लिने गरेको छ।

सरकारी निकायको हकमा १२ प्रतिशत छुट दिने गरेको छ। अर्थात् उपसमिति र मन्त्रीहरुले दुई घन्टा हेलिकप्टरबाट निरीक्षण गर्दा प्रति घन्टा ४ लाख ९ हजार २ सय खर्च गरेका थिए। ‘पूर्वप्रधानमन्त्री र मन्त्रीहरूले हेलिकप्टरमा टेलिभिजनलाइ अन्तर्वार्ता दिनुभयो’, अनुगमनमा सहभागि एक सांसदले भने‘अनुगमनबाट के देखियो भन्नु, केही छैन।’ यसरी सरकारको ८ लाख हावामै सकियो । सेतोपाटीबाट

Loading...
प्रकाशित मिति १९ कार्तिक २०७५, सोमबार १२:४४